ვებგვერდი archevnebi.com “მოძრაობა სირცხვილიას” წამოწყებაა. მისი მიზანია, რომ შექმნას საინფორმაციო სივრცე არჩევნების შესახებ და ხელი შეუწყოს მოქალაქეების მონაწილეობის ზრდას 2024 წლის საპარლამენტო არჩევნებში. ვებგვერდის სამიზნე აუდიტორია საქართველოს ყველა ის მოქალაქეა, რომელსაც აქვს ხმის მიცემის უფლება ან სურვილი, რომ თავისუფალი და სამართლიანი არჩევნების ჩატარებას შეუწყოს ხელი. კამპანიის მთავარი სლოგანია “ყველანი არჩევნებზე“.
26 ოქტომბერი საქართველოს არჩევნების ისტორიაში ერთ-ერთი უმნიშვნელოვანესი თარიღია. წინა არჩევნების მონაცემებით, 250 000-მდე ახალგაზრდას ხმა არ მიუცია, მილიონამდე ემიგრანტიდან კი მხოლოდ 12 000-მა მიიღო არჩევნებში მონაწილეობა. აღნიშნულ ჯგუფებს აქვს პოტენციალი, რომ არჩევნების ბედი გადაწყვიტონ, ამიტომ ჩვენი მთავარი სამიზნე აუდიტორიები სწორედ ახალგაზრდები (18-35) და ემიგრანტები არიან.
ვებგვერდი აერთიანებს ტექნიკურ ინფორმაციას საქართველოში და საზღვარგარეთ მცხოვრები საქართველოს მოქალაქეებისათვის, რათა მათ არჩევნებში მონაწილეობის მიღება გაუმარტივოს; ასევე, ემსახურება მოხალისეების შეგროვებას კამპანიის აქტივობების სრულყოფილად განხორციელების მიზნით; პლატფორმა დამკვირვებლობის სურვილის მქონე მოქალაქეებს სთავაზობს სპეციალურ ონლაინ ტრენინგ-მოდულს, რომლის საშუალებითაც ნებისმიერ ქალაქსა თუ სოფელში მცხოვრებ პირს შესაძლებლობა ეძლევა, დისტაცნიურად გაიაროს გადამზადების პროცესი და დააკვირდეს არჩევნებს.
